सध्या सोशल मीडियाचे जाळे हे सर्वत्र पसरले आहे. सोशल मीडियावर कंटेन्ट क्रिएट करणारे रिल्स स्टार हे सर्वांची मने जिंकत आहेत. दिवसेंदिवस रिल्स स्टार हे सर्वांचे लक्ष वेधत आहेत. या रिल्स स्टारची लोकप्रियता आजकाल एका कलाकारापेक्षा कमी नसते. आपण पाहिले की काही रिल्स स्टार रिअॅलिटी शोमध्ये दिसले तर काहींनी चित्रपटांमध्ये छोट्या भूमिका साकारल्या. आता एक अशी रिल्स स्टार चर्चेत आहे तिला थेट मालिकेमध्ये काम करण्याची संधी मिळाली आहे.
आम्ही ज्या रिल्सस्टारविषयी बोलत आहेत ती आहे श्रद्धा पवार. स्टार प्रवाह वाहिनीवर पावसाळ्याच्या सुरुवातीलाच प्रेक्षकांसाठी ‘मराठी मिडीयम’ ही एक नवीकोरी मालिका येत आहे. या मालिकेच्या निमित्ताने तरुणांची लाडकी सोशल मीडिया इन्फ्लुएन्सर (Reelstar) श्रद्धा पवार छोट्या पडद्यावर पदार्पण करत आहे. तिच्यासोबत अभिनेता अक्षय नलावडे मुख्य भूमिकेत दिसणार आहे. सोशल मीडिया स्टार ते टीव्ही अभिनेत्री असा श्रद्धाचा हा नवा प्रवास पाहण्यासाठी तिचे चाहते प्रचंड उत्सुक असून, सोशल मीडियावर या मालिकेची जोरदार चर्चा सुरू झाली आहे.
मराठी शाळांची अस्मिता जपणारा प्रोमो प्रदर्शित
नुकताच या मालिकेचा प्रोमो सर्वत्र प्रदर्शित करण्यात आला आहे. सध्या राज्यात अनेक ठिकाणी मराठी शाळांच्या अस्तित्वावर प्रश्नचिन्ह निर्माण झाले आहे. काही शाळा बंद पडत आहेत, तर काही अडचणीत सापडल्या आहेत. याच ज्वलंत आणि महत्त्वाच्या विषयावर ही मालिका आधारित आहे. प्रोमोमध्ये अक्षयचे पात्र मराठी शाळेच्या विरोधात असून त्याला ती शाळा पाडायची आहे, तर दुसरीकडे श्रद्धा एका शिक्षिकेच्या भूमिकेत शाळेच्या रक्षणासाठी खंबीरपणे उभी असल्याचे पाहायला मिळत आहे.
नेटकऱ्यांनी व्यक्त केल आनंद
स्टार प्रवाहने त्यांच्या सर्व सोशल मीडिया प्लॅटफॉर्मवर शेअर केलेल्या या प्रोमोला प्रेक्षकांचा भरभरून प्रतिसाद मिळत आहे. सध्याच्या काळात अशा सामाजिक विषयावरील मालिकेची नितांत गरज असल्याचे मत अनेक नेटकऱ्यांनी व्यक्त केले आहे. मात्र, नव्या मालिकेचे स्वागत करत असतानाच, काही प्रेक्षकांनी स्टार प्रवाहकडे कमेंट्सच्या माध्यमातून एक विशेष विनंती केली आहे. या नव्या मालिकेसाठी आमच्या आवडत्या जुन्या मालिकांची वेळ बदलू नका, अशी मागणी अनेक मालिकाप्रेमी करत आहेत.
