आयपीएल 2026 च्या सीजनची काल सांगता झाली. फायनलमध्ये रॉयल चॅलेंजर्स बंगळुरुने गुजरात टायटन्सवर 5 विकेट राखून विजय मिळवला. रॉयल चॅलेंजर्स बंगळुरुने सलग दुसऱ्यांदा आयपीएलची ट्रॉफी जिंकली. फायनलमध्ये विराट कोहलीने दमदार खेळ दाखवला. RCB चे बॉलर्स आणि विराटची फलंदाजी या बळावर बंगळुरुने दुसऱ्यांदा आयपीएल ट्रॉफी जिंकली. फायनलमध्ये विराट कोहलीने शानदार नाबाद 75 धावंची खेळी केली. फायनल RCB ने जिंकली. पण त्यापेक्षा जास्त चर्चा आहे ती वैभव सूर्यवंशीची. राजस्थान रॉयल्सच्या या युवा ओपनरने यंदाचा सीजन गाजवला. 15 वर्षाच्या या मुलाने भल्या-भल्या गोलंदाजांची वाट लावली. त्यांची गोलंदाजी फोडून काढली. वैभव सूर्यवंशीला काल टुर्नामेंटमधील सर्वोत्तम खेळाडू म्हणून गौरवण्यात आलं. ऑरेंज कॅपचा पुरस्कार जिंकणारा तो पहिला अनकॅप्ड खेळाडू ठरला.
वैभवला मोस्ट व्हॅल्युएबल प्लेयर ऑफ द सीझन, इमर्जिंग प्लेयर ऑफ द सीझन, सुपर स्ट्रायकर ऑफ द सीझन आणि मोस्ट सिक्सर्स हे पुरस्कारही मिळाले. सोशल मीडियापासून सगळीकडे सध्या वैभव सूर्यवंशीची चर्चा आहे. जसप्रीत बुमराह सारख्या टॉप बॉलरला त्याने पहिल्या चेंडूवर सिक्स मारला. टीम इंडियाच्या आणि परदेशातील दर्जेदार गोलंदाजांवर त्याने हल्ला चढवला. वैभव सूर्यवंशीचं टॅलेंट पाहून त्याच्यासाठी लवकरात लवकर टीम इंडियाचे दरवाजे उघडले गेले पाहिजेत अशी मागणी जोर धरु लागली आहे. वैभवला सिनियर टीम इंडियात कधी संधी मिळणार? ती येणारी वेळच ठरवेल.
त्याच्यातलं वेगळेपण अत्यंत अचूकतेने हेरलं ते सचिन तेंडुलकरने
पण वैभव सूर्यवंशी इतरांपेक्षा उजवा का आहे? त्याच्यात एवढं टॅलेंट कसं? त्याचं अचूक विश्लेषण क्रिकेटचा देव सचिन तेंडुलकरने केलं आहे. सगळेच वैभव सूर्यवंशीचं कौतुक करतायत, पण त्याच्यातलं वेगळेपण अत्यंत अचूकतेने हेरलं ते सचिन तेंडुलकरने. सचिन तेंडुलकरने वैभव सूर्यवंशीच्या खेळाचं जे विश्लेषण केलं, त्याला तोड नाहीय.
वैभव सूर्यवंशीबद्दल सचिन तेंडुलकरचं विश्लेषण काय?
“सगळे वैभव सूर्यवंशीबद्दल बोलतायत. मी त्याची फलंदाजी पाहिली. खूप सुंदर बॅटिंग करतो. त्याच्यात काहीतरी खास आहे. पण मी जे पाहिलं, त्यानुसार तो फक्त चेंडू मारत नाही. तो उत्तमरित्या मनगटाचा वापर करतो. सर्वबाजूंना फटकेबाजी करण्यासाठी मनगटाचा कौशल्याने वापर करता आला पाहिजे. तो फक्त हिटिंग करत नाही, तर दुसऱ्या फलंदाजांच्या तुलनेत तो चेंडूचा दिशा आणि टप्पा आधी ओळखतो. त्यामुळे त्याला चेंडू सीमारेषेपार पोहोचवणं सहज जमतं” असं सचिन तेंडुलकर म्हणाला.
