शिवसेना (उद्धव बाळासाहेब ठाकरे) गटातील खासदारांच्या बंडखोरीनंतर राज्यातील राजकीय घडामोडींना वेग आला आहे. या पार्श्वभूमीवर बंडखोर खासदार संजय दीना पाटील यांच्या कन्या राजुल पाटील यांनी मातोश्रीवर जाऊन शिवसेना पक्षप्रमुख उद्धव ठाकरे यांची भेट घेतल्याने राजकीय चर्चांना उधाण आले आहे.
भेटीनंतर माध्यमांशी संवाद साधताना राजुल पाटील यांनी आपली भूमिका स्पष्ट केली. “मी अजूनही शिवसेना (उद्धव बाळासाहेब ठाकरे) पक्षातच आहे आणि उद्धव ठाकरे यांच्या सोबतच आहे,” असे त्यांनी ठामपणे सांगितले. तसेच प्रत्येकाला स्वतंत्र राजकीय निर्णय घेण्याचा अधिकार असल्याचेही त्यांनी नमूद केले.
दरम्यान, राजुल पाटील यांच्या या वक्तव्यावर प्रतिक्रिया देताना शिवसेना ठाकरे गटाच्या नेत्या सुषमा अंधारे यांनी सावध भूमिका घेतली. “आम्हाला या लोकांवर विश्वास नाही. खासदारांची मुलं आमच्यासोबत राहतील यावरही आम्ही आंधळा विश्वास ठेवू शकत नाही. खासदारांची मुलं आमच्यासोबत आहेत, या भ्रमात आम्ही नाही,” असे सुषमा अंधारे यांनी स्पष्ट केले.
यावेळी त्यांनी स्वतःला मिळणाऱ्या धमक्यांचाही उल्लेख केला. काही दिवसांपासून धमकीचे फोन आणि संदेश येत असल्याचे सांगत त्यांनी याबाबत पोलिसांकडे अधिकृत तक्रार दाखल केल्याची माहिती दिली. संबंधित प्रकरणाची चौकशी सुरू असल्याचेही त्यांनी सांगितले.
शिवसेनेतील सध्याच्या राजकीय घडामोडींमध्ये राजुल पाटील यांची मातोश्री भेट आणि त्यानंतर सुषमा अंधारे यांनी व्यक्त केलेली भूमिका यामुळे पक्षातील अंतर्गत परिस्थिती आणि विश्वासाच्या प्रश्नांवर पुन्हा चर्चा सुरू झाली आहे. आगामी काळात या घडामोडींचा राजकीय परिणाम काय होतो, याकडे सर्वांचे लक्ष लागले आहे.
