पुण्यश्लोक अहिल्यादेवी होळकर शेतकरी कर्जमुक्ती योजना 2026
Ahilyadevi Holkar Shetkari Karjmafi Yojana 2026: शेतकरी कर्जमाफीचा दोनदा मुहूर्त टळल्याने शेतकऱ्यांच्या काळजाचा ठोका चुकला आहे. पण सरकार दरबारी कर्जमाफीसाठीच्या प्रक्रिया सुरू आहेत. निर्धारीत वेळेत पात्र शेतकऱ्यांना कर्जमाफी मिळावी यासाठी फडणवीस सरकारने कंबर कसली आहे. आयकर देणाऱ्या शेतकऱ्यांची यादी तयार करण्याचे आणि त्यांना लाभ न देण्याचे धोरण ठरवण्यात आले आहेत. त्यासाठी कर्जमाफी लांबली आहे. पण इतर प्रक्रियांना वेग आला आहे. कर्जमाफीचा लाभ देण्यात दिरंगाई टाळण्यासाठी सरकारने वेगवान पावलं टाकायला सुरुवात केली आहे. त्यासाठी महत्त्वाचे खाते सुद्धा बँक ऑफ महाराष्ट्रमध्ये सुरू करण्यात आले आहे.
बँक ऑफ महाराष्ट्रमध्ये पूल बँक खाते
पुण्यश्लोक अहिल्यादेवी होळकर शेतकरी कर्जमुक्ती योजना 2026 अंतर्गत पात्र शेतकऱ्यांना कर्जमाफीचा थेट लाभ देण्यासाठी सरकारचे प्रयत्न सुरू आहेत. त्यातील एक महत्त्वाचा टप्पा पूर्ण करण्यात आला आहे. बँक ऑफ महाराष्ट्रमध्ये पूल बँक खाते उघडण्यात आले आहे. सहकार आयुक्त आणि निबंधक, सहकारी संस्था, महाराष्ट्र राज्य, पुणे या नावाने हे खाते सुरू करण्यात आले आहे. बँक ऑफ महाराष्ट्रच्या मुंबई येथील गव्हर्मेंट बिझनेस शाखेत हे खाते उघडण्यात आले आहे. या खात्यातून राज्यातील पात्र शेतकऱ्यांच्या कर्जमाफीसाठी निधी वितरीत करण्यात येणार आहे. या खात्याच्या माध्यमातून कर्जमाफी योजनेच्या निधी वितरणावर नियंत्रण, देखरेख ठेवण्यात येणार आहे.
पूल बँक खाती काय?
पूल बँक खात्यातंर्गत अनेक उप-खाती असतात. या खात्यात अनेक लाभार्थ्यांना एकाचवेळी निधी वितरीत करण्यासाठी एक केंद्रीय खाते तयार करण्यात येते. या मध्यवर्ती खात्यातून मग इतर खात्यात निधी वितरीत करण्यात येतो. बड्या कंपन्या कर्मचारी वेतनासाठी, निधी वितरणासाठी, बँका वा इतर मोठ्या संस्था अशा खात्याचा वापर करतात. सरकारकडेही अशी खाती असतात. त्यातून निधी वितरण आणि व्यवस्थापन करणे सोपे होते.
एका क्लिकवर धडाधड जमा होणार रक्कम
पूल खात्यातील निधी एका क्लिकवर अनेक खात्यात वितरीत होतो. हा निधी 24 तासांच्या आता संबंधित खात्यात जमा होतो. ती खाती मग कोणत्याही पतसंस्था, राष्ट्रीय, खासगी बँका असोत. त्यामध्ये एकाच केंद्रीयकृत खात्यातून रक्कम पाठवली जाते. पूल खात्यातील रक्कम कर्जमाफी पात्र शेतकऱ्यांच्या खात्यात जमा होईल. महाआयटी (MahaIT) या सर्व प्रक्रियेचे व्यवस्थापन करत आहे. ही सर्व प्रक्रिया ऑनलाईन होणार आहे. योजनेत पारदर्शकता राहावी यासाठी सरकारने हे पाऊल उचलले आहेत.
कर्जमाफीचा मुहूर्त केव्हा?
सरकारने आयकर भरणाऱ्या शेतकऱ्यांची नावे हुडकण्यासाठी कर्जमाफी योजना लांबणीवर टाकली आहे. ही प्रक्रिया येत्या काही दिवसात पूर्ण होईल. पुढील आठवड्यात कदाचित कर्जमाफी योजनेचा लाभ शेतकऱ्यांच्या खात्यात जमा होऊ शकतो. अद्याप सरकारने त्याविषयीची अधिकृत घोषणा केलेली नाही.
