IPL 2026: अर्शदीप सिंगला Video तयार करणं पडणार महागात, दिल्ली कॅपिटल्सनेही खेळाडूंच्या कुटुंबियांना रोखलंImage Credit source: IPL/BCCI
आयपीएल स्पर्धेतून क्रीडाप्रेमी दरवर्षी मनोरंजनाचा तडका मिळतो. पण असं असताना या स्पर्धेला अनेकदा वादाची किनारही लाभली आहे. प्रत्येक पर्वात काही ना काही वाद होत असतो. काही प्रकरणं मैदानात, तर काही प्रकरणं मैदानाबाहेर घडतात. त्यामुळे बीसीसीआयला सारवासारव करण्यासाठी धावाधाव करावी लागते. यंदाच्या पर्वात असाच एक वाद समोर आला असून खळबळ उडाली आहे. खेळाडू आणि सपोर्ट स्टाफच्या नातेवाईक, ओळखीच्या व्यक्तींमुळे बीसीसीआयला मोठं पाऊल उचलावं लागलं आहे. एका रिपोर्टमध्ये धक्कादायक बातमी समोर आल्याने बीसीसीआय प्रशासन खडबडून जागं झालं आहे.बीसीसीआयने नियम आणखी कठोर करत कारवाईचा बडगा उचलला आहे. रिपोर्टनुसार, पंजाब किंग्सने अर्शदीप सिंगला व्लॉगिंग करण्यास मनाई केली आहे. तर दिल्ली कॅपिटल्सने खेळाडू आणि सपोर्ट स्टाफच्या कुटुंबियांना व्हिडीओ पोस्ट करू नका अशा सूचना दिल्या आहेत.
अर्शदीप सिंग सामन्यानंतर खेळाडूंसोबत चर्चा करत व्हिडीओ करायचा. तसेच एअरपोर्ट, हॉटेल आणि विमानातही व्हिडीओ रेकॉर्डिंग करायचा. पंजाब किंग्सच्या एका खेळाडूने व्हिडीओ रेकॉर्ड केला होता. त्यात युजवेंद्र चहल वेपिंग करताना दिसला होता. त्यामुळे वादाला फोडणी मिळाली होती. बीसीसीआयने म्हटले आहे की, “आयपीएल फ्रँचायझी मालक आणि त्यांच्या प्रतिनिधींना सामन्यांदरम्यान डगआऊट, ड्रेसिंग रूम किंवा मैदानावर खेळाडू किंवा संघ अधिकाऱ्यांशी संवाद साधण्यास किंवा त्यांच्या जवळ जाण्यास सक्त मनाई आहे. सर्व मालकांनी नियमांचे पालन करणे आवश्यक आहे; या नियमाचे उल्लंघन केल्यास कारवाई केली जाईल.”
हनी ट्रॅपच्या धोक्यामुळे बीसीसीआयने आयपीएलमध्ये खेळाडू, सपोर्ट स्टाफ सदस्य आणि संघ अधिकाऱ्यांच्या हॉटेल खोल्यांमध्ये अनोळखी व्यक्तींना प्रवेश करण्यावर बंदी घातली आहे. दरम्यान, एका खेळाडूच्या गर्लफ्रेंडने दोनदा संघाच्या बातम्या लीक केल्याचा दावा करणारा एक अहवालही समोर आला आहे. पण टीव्ही 9 नेटवर्क या बातमीची पुष्टी करत नाही. पण या बातम्या आणि सोशल मीडियावरील चर्चांनी बीसीसीआय प्रशासन खडबडून जागं झालं आहे. बीसीसीआयने नियमांचं पालन करण्याच्या सूचना दिल्या आहेत. हनी-ट्रॅपमधील संभाव्य धोक्यांबद्दल बीसीसीआयने सतर्क आणि सावध राहण्याच्या सूचनाही केल्या आहेत.
