ऑनलाइन औषध विक्री, ई-फार्मसी आणि मोठ्या कॉर्पोरेट कंपन्यांकडून दिल्या जाणाऱ्या मोठ्या सवलतींच्या विरोधात देशभरातील केमिस्ट आणि औषध विक्रेत्यांनी बुधवारी देशव्यापी बंद पुकारला. ऑल इंडिया ऑर्गनायझेशन ऑफ केमिस्ट अँड ड्रगिस्ट्स (AIOCD) यांच्या आवाहनाला महाराष्ट्रासह देशभरातून मोठा प्रतिसाद मिळाला. त्यामुळे अनेक शहरांतील हजारो मेडिकल स्टोअर्स दिवसभर बंद ठेवण्यात आली.
सांगली शहरातही या बंदचा मोठा परिणाम पाहायला मिळाला. मेडिकल दुकाने बंद असल्यामुळे औषधे घेण्यासाठी आलेल्या रुग्ण आणि त्यांच्या नातेवाईकांची मोठी गैरसोय झाली. अनेकांना आवश्यक औषधे मिळण्यासाठी इतर भागात धावपळ करावी लागली. काही ठिकाणी औषध विक्रेत्यांनी मूक मोर्चे, निदर्शने आणि धरणे आंदोलन करत सरकारच्या धोरणांविरोधात नाराजी व्यक्त केली.
औषध विक्रेत्यांचे म्हणणे आहे की, ऑनलाइन औषध विक्रीमुळे छोट्या मेडिकल व्यवसायांवर मोठा परिणाम होत आहे. मोठ्या कंपन्यांकडून दिल्या जाणाऱ्या सवलतींमुळे स्थानिक मेडिकल दुकानदार आर्थिक अडचणीत सापडत असल्याचा दावा त्यांनी केला आहे.
