धाराशिवच्या परांडा तालुक्यात हृदयद्रावक घटना घडली आहे. स्विमिंग पूलमध्ये पोहण्याचा अनुभव असलेल्या मात्र पहिल्यांदाच विहिरीच्या पाण्यात उतरलेल्या 19 वर्षीय तरुणाचा खोल पाण्याचा अंदाज न आल्याने बुडून दुर्दैवी मृत्यू झाला. वडिलांच्या आणि बहिणीच्या डोळ्यांसमोर ही थरारक व हृदयद्रावक परंडा तालुक्यातील भोंजा येथे घडली आहे. या घटनेमुळे परिसरात प्रचंड हळहळ व्यक्त होत आहे. कुंभेजा गावातील शुभम नागेश ननवरे असे मृत तरुणाचे नाव आहे. याबाबत सविस्तर माहिती जाणून घेऊयात.
मिळालेल्या माहितीनुसार, ननवरे कुटुंब हे मूळचे कुंभेजा येथील असून, ते कामानिमित्त आणि मुलांच्या शिक्षणासाठी पुणे येथे स्थायिक होते. गावी आयोजित जागरण गोंधळाच्या कार्यक्रमासाठी तसेच उन्हाळ्याच्या सुट्टया असल्याने शुभम आपल्या कुटुंबासह गावी आला होता. शुभम ननवरे हा त्याचे वडील नागेश ननवरे, बहीण शुभांगी ननवरे (15), चुलते सतीश ननवरे आणि मामाचा मुलगा ओंकार हनुमंत जाधव (16) यांच्यासोबत घराशेजारीलच भोंजा शिवारातील नाना ननवरे यांच्या विहिरीवर पोहोण्यासाठी गेला होता.
विहिरीच्या पाण्याचा अंदाज न आल्याने गेला जीव
यावेळी शुभम, शुभांगी आणि ओंकार हे तिथे विहिरीत पोहण्यासाठी उतरले. मात्र, विहिरीतील पाण्याचा अंदाज न आल्याने तिघेही अचानक बुद्ध लागले. घाबरलेल्या तिघांनीही पाण्यात एकमेकांचे हात घट्ट पकडले. मुलांचा जीव धोक्यात आल्याचे पाहून काठावर उभे असलेले वडील नागेश आणि चुलते सतीश ननवरे यांनी जीवाची पर्वा न करता तात्काळ पाण्यात उड्या घेऊन त्यांना वाचवण्याचा आटोकाट प्रयत्न केला.
काही वेळाने आढळला मृतदेह
दोघांनी शुभांगी आणि ओंकार या दोघांना सुखरूप पाण्यातून बाहेर काढले, मात्र दुर्दैवाने त्याच वेळी शुभमचा हात ओंकारच्या हातातून सुटला आणि तो वडिलांच्या व बहिणीच्या डोळ्यांदेखत खोल पाण्यात बुडाला. घटनेनंतर नातेवाइकांनी केलेल्या आरडाओरडामुळे कुंभेजा व भोंजा परिसरातील ग्रामस्थांनी विहिरीकडे धाव घेतली. अनेक स्थानिक तरुणांनी शुभमचा शोध घेण्यासाठी तात्काळ विहिरीत उड्या घेतल्या. मात्र, विहिरीत पाणी जास्त असल्याने शोध कार्यात अडथळा येत होता. अखेर विहिरीवर एकाच वेळी तीन पाण्याचे पंप (मोटारी) लावून पाण्याचा उपसा करण्यात आला. त्यानंतर दुपारी शुभमचा मृतदेह आढळून आला.
