America Iran War : गेल्या अनेक दिवसांपासून इराण आणि अमेरिका-इस्रायल यांच्यात युद्ध सुरू आहे. या युद्धाचा संपूर्ण जगाने धसका घेतलेला आहे. हे युद्ध थांबावे यासाठी अमेरिका आणि इराण यांच्यात पाकिस्तानातील इस्लामाबदमध्ये एक बैठक झाली. परंतु या बैठकीत कोणताही ठोस निर्णय घेण्यात आला नाही. या बैठकीनंतर मात्र अमेरिका आणि इराण यांच्यातील तणाव जास्तच वाढला आहे. अमेरिकेने इराणी बंदर तसेच होर्मुझच्या खाडीतील सर्वच बंदरांवर नाकेबंदी सुरू केली आहे. तर दुसरीकडे इराणने मात्र ही नाकेबंदी मान्य नसल्याचं म्हटलं आहे. दोन्ही देशांच्या या भूमिकेमुळे जग मात्र तेलसंकटाने होरपळत आहे. असे असतानाच आता जगाला हादरवून टाकणारी माहिती समोर आली आहे. अमेरिका आणि इराण यांच्यातील युद्धविराम संपुष्टात आला असून इराणने अमेरिकेच्या बोटीवरच थेट हल्ला केला आहे. इराणे अमेरिकन जहाजांवर थेट क्षेपणास्त्र डागले आहेत, असे बोलले जात आहे.
नेमकी काय माहिती समोर आली आहे.
मिळालेल्या माहितीनुसार इराण आणि अमेरिका यांच्यातील युद्धविरामाचा करार आता मोडण्यात आला आहे. होर्मुझच्या खाडीत इराणे हा करार मोडला असून थेट अमेरिकन जहाजावर हल्ला केला आहे. अमेरिकेने या सामुद्रधुनीत आजपासून ‘मिशन फ्रिडम’ सुरू केले होते. त्यानंतर आता प्रत्युत्तर म्हणून इराणने अमेरिकन बोटीवर हल्ला केला आहे. या हल्ल्यानंतर आता इराणमध्ये अलर्ट जारी करण्यात आला आहे. इराणच्या या हल्ल्यानंतर आता इराण-अमेरिका यांच्यातील महाभयंकर युद्धाला नव्याने सुरुवात झाल्याची भीती व्यक्त केली जात आहे.
युद्ध आणखी भडकणार का?
इराणने अमेरिकन बोटीवर हल्ला केल्यानंतर हल्ल्याच्या ठिकाणी स्पीडबोट पाहायला मिळाली. अमेरिकेकडून होर्मुझच्या खाडीवर नियंत्रण मिळवण्याचा प्रयत्न केला जात आहे. तर काहीही झालं तर या सामुद्रधुनीचे नियंत्रण आम्ही कोणाकडेही देणार नाही, अशी भूमिका इराणने घेतली आहे. दुसरीकडे अमेरिकेने मात्र आमच्या बोटीवर कुठलाही हल्ला झालेला नाही, असे अमेरिकेने सांगितले आहे. त्यामुळे आता पुढच्या काही दिवसांत नेमके काय होणार? याकडे जगाचे लक्ष लागले आहे. दोन्ही देशांत युद्ध भडकलेच तर भविष्यात आणखी मोठे तेलसंकट निर्माण होण्याची भीती व्यक्त केली जात आहे.
