नीट पेपेरफुटी प्रकरणात मोठी अपडेट Image Credit source: टीव्ही 9 मराठी
नीट परीक्षा ही वैद्यकीय शिक्षणासाठी अतिशय महत्त्वाची परीक्षा आहे. मात्र गेल्या काही दिवसांपासून या परीक्षेवरून देशभरात मोठा गोंधळ सुरू आहे. नीट परीक्षेचे पेपर लीक झाल्याचं समोर आल्यानंतर देशभरात मोठी खळबळ उडाली होती, त्यानंतर सरकारने ही परीक्षाच रद्द केली, तसेच या प्रकरणाचा तपास सीबीआयकडे सोपवला, दरम्यान या प्रकरणात सीबीआयने आतापर्यंत अनेकांना अटक केली आहे. सीबीआयने ज्यांना अटक केलं, त्यामध्ये शिवराज मोटेगावकर आणि मनिषा मांढरे यांचा देखील समावेश आहे. दरम्यान आता या प्रकरणात एक मोठी बातमी समोर येत आहे, ती म्हणजे शिवराज मोटेगावकर आणि मनिषा मांढरे यांच्या अडचणी वाढण्याची शक्यता आहे. सीबीआयने मोठा निर्णय घेतला आहे.
नीट पेपरफुटी प्रकरणात आता शिवराज मोटेगावकर आणि मनिषा मांढरे यांच्या स्वाक्षरीचे नमुने घेतले जाणार आहेत. स्वाक्षरीचे नमुने मिळवण्यासाठी सीबीआयने न्यायालयाकडे परवानगी मागितली आहे. फॉरेन्सिक विभागाकडून दोघांच्या स्वाक्षरीचे नमुने तपासले जाणार आहेत. एनटीएच्या किंवा इतर महत्वाच्या कागदपत्रांवर तसेच बँक व्यवहार करत असताना कुठली स्वाक्षरी केली? याचा सुद्धा तपास यावेळी करण्यात येणार आहे. नीट पेपरफुटी प्रकरणात दोन्ही आरोपी सध्या सीबीआयच्या कोठडीत आहेत.
लातूरमधील ‘रेणुकाई करिअर सेंटर’चा संचालक शिवराज मोटेगावकर याला नीट पेपरफुटी प्रकरणात सीबीआयकडून 17 मे रोजी चौकशीसाठी ताब्यात घेण्यात आलं होतं. त्याला पुण्यातून ताब्यात घेण्यात आलं. त्याच्या चौकशीमधून धक्कादायक माहिती समोर आली होती. मोटेगावकरांनी परीक्षेच्या दहा दिवसांआधीच प्रश्नपत्रिका मिळवली होती. सूत्रांकडून मिळालेल्या माहितीनुसार मोटेगावकरला मेडिकल कॉलेजची स्थापना करायची होती, मात्र तो स्वत: डॉक्टर नसल्यामुळे मेडिकल कॉलेजची स्थापना करणं शक्य नव्हतं. म्हणून त्याने युक्ती लढवली, त्याने आपल्या मुलाला डॉक्टर करण्याचा निर्णय घेतला, आणि आपल्या मुलासाठीच मोटेगावकर याने नीटचा पेपर फोडल्याची माहिती समोर येत आहे. दरम्यान मोटेगावकरच्या मेडिकल कॉलेजचं 50 टक्के काम पूर्ण देखील झाल्याची माहिती समोर येत आहे. मात्र आता त्याच्या अडचणी चांगल्याच वाढल्या आहेत.
