पाकिस्तानमधून भारताच्या आणखी एका शत्रूचा खात्मा झाल्याची बातमी समोर आली आहे. समोर आलेल्या माहितीनुसार, जैश-ए-मोहम्मदचा वरिष्ठ कमांडर मौलाना सलमान अजहर पाकिस्तानच्या बहावलपूरमध्ये संशयास्पद परिस्थितीत मारला गेला आहे. स्थानिक सूत्रांनी असा दावा केला आहे की, एका अज्ञात वाहनाने त्याला धडक दिली, ज्यामध्ये त्याचा मृत्यू झाला. मात्र, या घटनेला अद्याप पाकिस्तानकडून अधिकृत दुजोरा मिळालेला नाही. मारला गेलेला कमांडर सलमान अजहर हा संघटनेचा प्रमुख मसूद अजहरच्या अत्यंत जवळचा होता आणि त्याच्या ऑपरेशन्समध्ये महत्त्वाची भूमिका बजावत असे.
यापूर्वीही अशाच प्रकारची एक घटना समोर आली होती, जेव्हा जून २०२५ मध्ये जैश-ए-मोहम्मदचा दुसरा एक मोठा कमांडर मौलाना अब्दुल अजीज इसार याचाही पाकिस्तानच्या पंजाब प्रांतात रहस्यमय परिस्थितीत मृत्यू झाला होता. काही रिपोर्ट्समध्ये त्याचा मृत्यू हृदयविकाराच्या झटक्याने झाल्याचे सांगण्यात आले, पण मृत्यूचे नेमके कारण स्पष्ट होऊ शकले नाही. अब्दुल अजीज इसारवर भारतात अनेक दहशतवादी कारवायांचा कट रचल्याचा आरोप होता. २०१६ च्या नगरोटा हल्ल्यासारख्या अनेक प्रकरणांशी त्याचे नाव जोडले गेले होते.
भारताच्या शत्रूंना कोण संपवतंय?
पाकिस्तानमध्ये झालेली ही सलग दुसऱ्या दहशतवाद्याची हत्या आहे. याआधी मुंबई हल्ल्याचा मास्टरमाइंड हाफिज सईदचा जवळचा सहकारी आणि लष्कर-ए-तैयबाचा प्रमुख नेता शेख युसूफ आफ्रिदी याला २६ एप्रिल रोजी ठार करण्यात आले. अज्ञात सशस्त्र हल्लेखोरांनी त्याच्यावर अंदाधुंद गोळीबार केला. हल्लेखोरांच्या या हल्ल्यातून त्याला सावरण्याची संधीही मिळाली नाही.
याच्या काही काळ आधी लष्कर-ए-तैयबाचा सह-संस्थापक आणि दहशतवादी संघटनेचा दुसरा मोठा नेता अमीर हमजा याच्यावरही लाहोरमध्ये जीवघेणा हल्ला करण्यात आला होता. येथेही काही अज्ञात बंदूकधारी आले आणि त्यांनी त्याच्यावर गोळ्यांचा वर्षाव केला, ज्यामध्ये हमजा गंभीर जखमी झाला.
गेल्या २-३ वर्षांत पाकिस्तानमध्ये ज्या प्रकारे दहशतवादी संघटनांचे मोठे चेहरे मारले गेले आहेत, त्याने सुरक्षा यंत्रणांनाही चकित केले आहे. यापूर्वीही अनेक मोठी नावे अशाच प्रकारे लक्ष्य करण्यात आली. विशेष म्हणजे, या हल्ल्यांची पद्धत जवळपास सारखीच आहे – जवळून गोळीबार करणे आणि लगेच फरार होणे. यावरून हे संकेत मिळतात की, हे काम एखाद्या संघटित नेटवर्कद्वारे केले जात आहे.
२०२३ मध्ये अशा घटनांमध्ये अचानक वाढ झाली होती, जेव्हा काही महिन्यांतच अनेक मोठे दहशतवादी मारले गेले. त्यानंतर २०२४, २०२५ आणि आता २०२६ मध्येही हा सिलसिला सुरूच आहे. यावरून हे स्पष्ट होते की, या केवळ एक-दोन घटना नसून एक ठराविक ‘पॅटर्न’ बनला आहे; आणि हे हल्ले नेमके कोण घडवून आणत आहे, हे आता आयएसआयलाही (ISI) समजेनासे झाले आहे.
