Petrol Diesel Price : अमेरिका आणि इराण यांच्यातील युद्धामुळे संपूर्ण जगात इंधनाची टंचाई निर्माण झाली आहे. भारतात तर घरगुती गॅस सिलिंडरपासून ते पेट्रोल, डिझेलची किंमत वाढली आहे. परिस्थिती अशीच राहिली तर देश अडचणीत सापडण्याची शक्यता व्यक्त केली जात आहे. हीच बाब लक्षात घेता पंतप्रधान नरेंद्र मोदी यांनीदेखील नागरिकांनी काटकसरीने वागावे असे आवाहन केले आहे. दरम्यान, एकीकडे भारतात काटकसरीने वागण्याचे आवाहन केले जात असताना दुसरीकडे पाकिस्तानने मात्र मोठा निर्णय घेतला आहे. भारतात पेट्रोल, डिझेलची किंमत वाढली आहे. परंतु पाकिस्तानने मात्र या दोन्ही इंधनांची किंमत थेट कमी करून टाकली आहे.
पाकिस्तानात पेट्रोल, डिझेलचा भाव किती?
मिळालेल्या माहितीनुसार पाकिस्तान सरकारने पेट्रोल आणि डिझेलची किंमत कमी केली आहे. सरकारने या दोन्ही इंधनांचा भाव 5 रुपयांनी कमी केला आहे. या निर्णयानंतर आता पाकिस्तानात पेट्रोलचा भाव 409.78 पाकिस्तानी रुपये प्रति लिटर आणि हाय-स्पीड डिझेलचा भाव 409.58 पाकिस्तानी रुपये प्रती लिटर झाला आहे. 28 फेब्रुवारी रोजीपासून इराण आणि अमेरिका यांच्यात युद्ध सुरू झाले. तेव्हापासून पाकिस्तानात इंधनाचा भाव कधी कमी होतोय तर कधी वाढतोय. गेल्याच आठवड्यात पाकिस्तानने पेट्रोलचा भाव 14.92 पाकिस्तानी रुपयांनी तर हाय-स्पीड डिझेलचा भाव 15 रुपये पाकिस्तानी रुपयांनी वाढवला होता. 6 मार्च रोजीदेखील पाकिस्तानने पेट्रोल आणि डिझेलच्या किमतीत 55 रुपयांनी (पाकिस्तानी) वाढ केली होती.
भारतात नेमकी काय स्थिती?
पाकिस्तानने सध्या पेट्रोल आणि डिझेलचा भाव कमी केला असला तरीही भारतात मात्र स्थिती वेगळी आहे. भारतात चार वर्षांनी तेल कंपन्यांनी पेट्रोल आणि डिझेलच्या किमतीत 3 रुपयांनी वाढ केली आहे. 2022 सालापासून पेट्रोल आणि डिझेलचा भाव स्थिर होता. याआधी मार्च 2024 मध्ये झालेल्या लोकसभा निवडणुकीच्या अगोदर पेट्रोल आणि डिझेलची किंमत प्रत्येकी 2 रुपयांनी कमी करण्यात आली होती.
दरम्यान, होर्मुझची सामुद्रधुनी पुन्हा नव्याने कधी सुरू होणार आणि इंधनाचा पुरवठा कधी सुरळीत होणार याकडे भारत, पाकिस्तानसह समस्त जगाचे लक्ष लागले आहे. भविष्यात काय होणार, हे पाहणे महत्त्वाचे ठरणार आहे.
