विमान हायजॅक करण्याचा प्रयत्न Image Credit source: टीव्ही 9 मराठी
अमेरिकेमधून एक धक्कादायक घटना समोर आली आहे. विमानाच्या उड्डाणानंतर एका प्रवाशानं कथितरित्या विमानाच्या कॉकपिटमध्ये घुसण्याचा प्रयत्न केला. या घटनेमुळे प्रवाशांमध्ये मोठी खळबळ उडाली. युनायडेड एअरलाइन्सच्या एका विमानात हा प्रकार घडला आहे. हे विमान शिकागोवरून मिनियापोलीसला जात होतं. या धक्कादायक प्रकारानंतर सुरक्षेची खबरदारी म्हणून हे विमान मध्येच विस्कॅन्सिनच्या मॅडिसन एअरपोर्टवर लँड करण्यात आलं. रिपोर्टनुसार बोइंग 737 विमानाने शुक्रवारी रात्री शिकागोच्या ओ हेयर इंटरनॅशनल विमानतळावरून टेक ऑफ केलं होतं. या विमानात 147 प्रवासी आणि 6 क्रू मेंबर होते. मात्र अचानक असा प्रकार घडल्यानं प्रवाशांमध्ये घबराटीचं वातावरण निर्माण झालं. हे विमान मध्येच उतरवण्यात आलं, तसेच या प्रवाशाला देखील अटक करण्यात आली आहे.
एअर ट्रॅफिक कंट्रोलच्या ऑडिओ रेकॉर्डिंगनुसार विमान पायलटने याची माहिती कंट्रोल रूमला देताना सांगितलं की विमानात असलेल्या अधिकाऱ्यांनी एका प्रवाशाला ताब्यात घेतलं आहे. त्यानंतर हे विमान मध्येच विस्कॅन्सिनच्या मॅडिसन एअरपोर्टवर लँड करण्यात आलं. या विमानतळावर ताब्यात घेण्यात आलेल्या प्रवाशाला विमानातून खाली उतरवण्यात आलं, दरम्यान तिथे आधीच पोलीस हजर होते, पोलिसांनी या प्रवाशाला ताब्यात घेतलं असून, त्याची चौकशी सुरू असल्याची माहिती पोलिसांनी दिली आहे.
या घटनेचं गांभीर्य प्रवाशांच्या तेव्हा लक्षात आलं, जेव्हा पायलट आणि क्रू मेंबर यांच्याकडून 7500 हा कोड सक्रिय करण्यात आला. हा कोड तेव्हाच सक्रिय करण्यात येतो जेव्हा पायलटला विमान हायजॅक झालं आहे, किंवा होणार आहे, अशी भिती वाटते. हा कोड सक्रिय करताच प्रवाशांमध्ये मोठा गोंधळ उडाला. समोर आलेल्या माहितीनुसार या प्रवाशाने अनेकदा विमानाच्या कॉकपीटमध्ये घुसण्याचा प्रयत्न केला. शेवटी या प्रवाशाला अटक करण्यात आल्यानं मोठा अनर्थ टळला आहे. प्रवाशांनी सुटकेचा निश्वास सोडला. या घटनेनं काही काळ मात्र चांगलाच गोंधळ उडाला होता. या प्रवाशाचा नेमका उद्देश काय होता? हे मात्र अजून स्पष्ट झालेलं नाहीये. पोलीस तपास सुरू आहे.
