शिवसेना ठाकरे गटाचे नेते संजय राऊत आणि केंद्रीय मंत्री नारायण राणे यांच्यातील मानहानी प्रकरणात आता नवी घडामोड समोर आली आहे. माझगाव न्यायालयात आज होणारी संजय राऊत यांची उलटसाक्ष पुढे ढकलण्यात आली आहे. आता या प्रकरणाची पुढील सुनावणी 6 जुलै रोजी होणार असल्याची माहिती समोर आली आहे.
हे प्रकरण 2023 मधील असून नारायण राणे यांनी एका भाषणादरम्यान संजय राऊत यांच्याबाबत केलेल्या वक्तव्यामुळे वाद निर्माण झाला होता. “संजय राऊत यांना मी खासदार केलं. त्यांना निवडून आणण्यासाठी पैसे खर्च केले. त्यांच्या नावाचा मतदार यादीत समावेश नव्हता,” असे विधान नारायण राणे यांनी केले होते. या वक्तव्यामुळे आपली बदनामी झाल्याचा आरोप करत संजय राऊत यांनी राणेंना मानहानीची नोटीस पाठवली होती.
या प्रकरणात न्यायालयीन प्रक्रिया सुरू असून दोन्ही नेत्यांमधील वाद पुन्हा चर्चेत आला आहे. 6 जुलै रोजी होणाऱ्या सुनावणीकडे आता राजकीय वर्तुळाचे लक्ष लागले आहे.
