नाशिकमध्ये स्वयंघोषित ज्योतिषी, ‘कॅप्टन’ आणि भोंदूबाबा म्हणून ओळखल्या जाणाऱ्या अशोक खरात यांच्यावर लैंगिक छळ, बलात्कार आणि महिलांचे शोषण यासंबंधीचे आतापर्यंत तीन गुन्हे दाखल झाले आहेत. या प्रकरणाने संपूर्ण महाराष्ट्र हादरला असून, खरातच्या कथित ‘दैवी शक्ती’च्या नावाखाली चालणाऱ्या अंधश्रद्धा आणि शोषणाच्या साम्राज्याचा पोल खोल झाली आहे. एका गर्भवती महिलेच्या पतीला जेव्हा कळाले की त्याच्या पत्नीसोबत खरातने नको ते केले. त्यानंतर त्याने मोठे पाऊल उचलले.
प्रकरणाची सुरुवात कशी झाली?
१७ मार्च रोजी अशोक खरात विरोधात पहिला गुन्हा दाखल झाला. एका विवाहित महिलेने अशोक खरात यांच्यावर लैंगिक छळाचा आरोप केला. गुन्हा दाखल होताच पोलिसांनी रात्री उशिरा गुप्तपणे त्याच्या निवासस्थानी छापा टाकला आणि अटक केली. अनेक राजकीय नेत्यांशी हितसंबंध असलेल्या खरातला अटक करताना पोलिसांनी कमालीची गोपनीयता पाळली होती. रविवारी आणखी दोन महिलांनी खरातविरोधात तक्रार दाखल केली. यातील एका घटस्फोटित महिलेची तक्रार तर दुसरी २०२३ मधील एका सात महिन्यांच्या गरोदर महिलेची आहे. या तक्रारींनंतर खरातच्या अघोरी साम्राज्याचा पर्दाफाश कसा झाला, हे आता स्पष्ट होत आहे.
पर्दाफाश कुणी केला? नेमके काय घडले?
पोलिस सूत्रांच्या माहितीनुसार, खरातचा मुख्य पर्दाफाश त्याच्या एकेकाळच्या अगदी जवळच्या आणि निस्सीम भक्त असलेल्या व्यक्तीने केला. ही व्यक्ती खरातच्या वाईट कृत्यांना साथ देत होती आणि त्यामुळे तो बराच काळ सुरक्षित राहिला होता. पण एका घटनेने सगळे उलटे झाले. २०२३ मध्ये ही व्यक्ती आपल्या सात महिन्यांच्या गरोदर पत्नीला घेऊन खरातकडे आली. प्रसूती सुरक्षित व्हावी, बाळाला चांगली संतती मिळावी यासाठी पूजा-विधी करायचे असल्याचे सांगून खरातने या व्यक्तीला केबिनच्या बाहेर बसवले. प्रभावाखाली असलेल्या व्यक्तीने बाहेर जाणे पसंत केले.
पण केबिनमध्ये लाइट बंद करून खरातने त्या गरोदर महिलेवर हात टाकला, अश्लील कृत्ये केली आणि तिचे लैंगिक शोषण केले. बाहेर आल्यानंतर महिलेच्या पतीला हा प्रकार सांगितला गेला. सुरुवातीला विश्वास बसला नाही, पण तिने आपल्या होणाऱ्या बाळाची शपथ घेतल्यावर सत्य समजले.
इथून सुरू झाला खरातच्या साम्राज्याचा अंत
या घटनेनंतर संबंधित व्यक्तीने खरातच्या हालचालींवर बारकाईने लक्ष ठेवले. संशय बळावल्यानंतर त्याने खरातच्या ऑफिस/केबिनमध्ये छुपे कॅमेरे बसवले. या कॅमेऱ्यांद्वारे केबिनमधील अनेक लैंगिक छळाचे व्हिडीओ त्याने रेकॉर्ड केले. हे सर्व पुरावे एका पेनड्राइव्हमध्ये घेऊन त्याने नाशिक पोलिसांकडे सादर केले. व्हिडीओ पाहून पोलिसांनाही धक्का बसला. या पुराव्यांमुळे खरातच्या साम्राज्याला सुरुंग लागला आणि एकापाठोपाठ गुन्हे दाखल होऊ लागले.
