राज्याचे मुख्यमंत्री देवेंद्र फडणवीस यांनी आज विधानसभेत अशोक खरात प्रकरणावर निवेदन सादर केले. त्यांनी सांगितले की, व्हाट्सअप एप्लिकेशनवर फिर्यादी आणि एका महिलेचे फोटो प्रसारित करून सोशल मीडियावर व्हायरल होण्याची धमकी देत पाच कोटींची खंडणी मागितली गेली होती. सदर फोटो दिनेश परब याला राजेंद्र जासूद यांनी दिल्याचे तक्रारीत नमूद आहे. यावरून वावी पोलीस ठाण्यात गुन्हा दाखल करण्यात आला असून, प्राथमिक तपास नाशिक ग्रामीण गुन्हे शाखेने केला आहे. अशोक खरातचा मोबाईल सायबर विभागाकडे तपासासाठी दिला गेला, मात्र त्यातून काही विशेष माहिती मिळालेली नाही. चॅटमध्येही काही पुरावे सापडले नाहीत. राजेंद्र जासूद आणि दिनेश परब यांना अटकपूर्व जामीन मिळाला आहे. तसेच, नीरज जाधव याच्या सहभागाबाबत तपास सुरू असून, त्याच्याकडून काही पुरावे मिळाले आहेत, अशी माहिती मुख्यमंत्री फडणवीस यांनी विधानसभेत दिली.
