मुंबईत मुसळधार पावसामुळे अनेक ठिकाणी पाणी साचल्याच्या घटना समोर येत आहेत. अशातच भांडुपमधील सोनापूर परिसरात रस्ता खचल्याची घटना घडली आहे. या घटनेमुळे परिसरात भीतीचे वातावरण निर्माण झाले असून नागरिकांनी प्रशासनाकडे तातडीने कारवाईची मागणी केली आहे.
मिळालेल्या माहितीनुसार, धो धो बरसणाऱ्या पावसामुळे रस्त्याखालील मातीच वाहून गेल्याने अचानक रस्त्याचा काही भाग खचला. सुदैवाने या घटनेत कोणतीही जीवितहानी झाली नाही. मात्र, वाहनचालक आणि स्थानिक नागरिकांमध्ये घबराट पसरली होती.
स्थानिक नागरिकांनी जवळच सुरू असलेल्या खोदकामामुळे रस्ता कमकुवत झाल्याचा दावा केला आहे. परिसरात काही दिवसांपासून खोदकाम सुरू असल्याने पावसाचे पाणी थेट रस्त्याखाली गेल्याचे नागरिकांचे म्हणणे आहे. त्यामुळेच रस्ता खचल्याचा आरोप त्यांनी संबंधित काम करणाऱ्या यंत्रणांवर केला आहे.
घटनेनंतर प्रशासन आणि स्थानिक अधिकारी घटनास्थळी दाखल झाले. परिसरात सुरक्षेच्या दृष्टीने बॅरिकेड्स लावण्यात आले असून पुढील तपास सुरू आहे.
