मध्य पूर्वेत मागच्या 35 पेक्षा जास्त दिवसांपासून सुरु असलेल्या युद्धात अखेर काल सीजफायरची घोषणा झाली. पण सीजफायर दीर्घकाळ टिकेल का? या बद्दल शंका आहे. कारण इस्रायलकडून शेजारच्या लेबनॉनवर भयंकर हल्ले सुरु आहेत. इस्रायलने इराण-अमेरिका सीजफायरचं समर्थन केलं आहे. पण दुसऱ्याबाजूला लेबनॉनवर इस्रायली हल्ले सुरुच आहेत. त्यामुळे इराणने स्ट्रेट ऑफ हॉर्मुज बंद केलं आहे. हे सीजफायर फक्त इराण बरोबर झालेलं आहे. लेबनॉनशी त्याचा काही संबंध नाही असा इस्रायलचा दावा आहे. लेबनॉनची सीमा इस्रायलला लागून आहे. तिथून अनेकदा इस्रायली नागरिकांवर रॉकेट हल्ला होतो. इस्रायलला हा प्रश्न कायमचा निकाली काढायचा आहे. यासाठी इस्रायल बफर झोन तयार करत आहे. लेबनॉनमधून हिज्बुल्लाहचा पूर्णपणे नायनाट हाच इस्रायलचं उद्देश आहे. त्यासाठी लेबनॉन सीजफायरचा भाग नाही असं इस्रायलचं म्हणणं आहे.
अमेरिकेने सुद्धा हे स्पष्ट केलय की, अमेरिका-इराण युद्धविरामाचा लेबनॉनशी काहीही संबंध नाही. अमेरिका आणि इस्रायल दोघांनी सीजफायरमध्ये लेबनॉनच्या समावेशाला सहमती दिलेली नाही. लेबनॉन या सीजफायरचा भाग आहे असं पाकिस्तानने म्हटल्यानंतर इस्रायलने अवघ्या 10 मिनिटात लेबनॉनवर 100 मिसाइल्स डागले. यात शेकडो लोक ठार झाले. लेबनॉन मिडिल ईस्टमधील एक छोटासा देश आहे. लेबनॉनमध्ये इराणने पोससेली हिजबुल्लाह ही दहशतवादी संघटना सक्रीय आहे. त्यांच्याकडून इस्रायलवर रॉकेट हल्ले सुरु असतात.
इस्रायलने काय म्हटलय?
लेबनॉनला सीजफायरच्या बाहेर का ठेवण्यात आलय? यावर अमेरिकी राष्ट्राध्यक्ष डोनाल्ड ट्रम्प यांनी हिज्बुल्लामुळे असं उत्तर दिलं. इराण विरुद्ध सैन्य कारवाई दोन आठवड्यांसाठी थांबवण्याच्या ट्रम्प यांच्या निर्णयाचं आम्ही समर्थन करतो असं इस्रायली पंतप्रधान बेंजामिन नेतन्याहू म्हणाले. 28 फेब्रुवारीला अमेरिका-इस्रायलने इराण विरुद्ध युद्ध सुरु केलं. दिवसेंदिवस हे युद्ध ऊर्जा युद्धामध्ये बदलू लागलं होतं. ज्याची किंमत सगळ्या जगाला चुकवावी लागत होती. त्यामुळे दोन आठवड्यांच्या सीजफायरच्या घोषणेमुळे सगळ्या जगाने सुटकेचा निश्वास सोडलाय. पाकिस्तानात उद्यापासून सीजफायर दीर्घकाळ रहावं यासाठी चर्चा सुरु होणार आहेत.
