माहिती तंत्रज्ञान क्षेत्रातील आघाडी कंपनी टाटा कन्सल्टन्सी सर्व्हिसेसची (टीसीएस) एचआर मॅनेजर निदा खान बद्दल महत्वाची माहिती समोर आली आहे. टीसीएसच्या नाशिक युनिटमधील अनेक धक्कादायक घटना उघडकीस आल्या आहेत. त्यामुळे राज्यचं नाही, देश हादरला आहे. टीसीएसमध्ये महिलांचं कसं लैंगिक शोषण केलं जायचं, धर्मांतराची दबाव अशा अनेक बाबी उघडकीस आल्या आहेत. जबरदस्तीने धर्मांतर प्रकरणात निदा खान आरोपी आहे. निदा खानचा शोध सुरु आहे. सध्या ती मुंबईत असून लवकरच ती तिच्या पहिल्या बाळाला जन्म देणार आहे असं तिच्या कुटुंबाकडून सांगण्यात आलय. निदा खानकडे कंपनीतील अनेक महिला कर्मचाऱ्यांनी तक्रारी केल्या होत्या. त्यांचं लैंगिक शोषण सुरु आहे. धर्मांतरासाठी दबाव टाकला जातो. गैरवर्तन केलं जातं. पण निदा खानने एचआर म्हणून या सर्व तक्रारी कशा हाताळल्या? यासाठी पोलिसांना तिची चौकशी करायची आहे.
सध्या फरार असलेल्या निदा खानने अटकपूर्व जामीन अर्जासाठी नाशिकच्या स्थानिक कोर्टात अर्ज केला आहे. तिने तिच्या अटकपूर्व जामीन अर्जात वैद्यकीय कंडीशनचा हवाला दिला आहे. त्या आधारावर तिला अटकपूर्व जामीन हवा आहे. निदा खान 25 वर्षांची असून तिने 2021 साली नाशिक टिसीएस जॉईंन केली होती. लैंगिक छळ आणि जबरदस्ती धर्मांतराच्या टीसीएस नाशिकशी संबंधित नऊ तक्रारींची पोलीस चौकशी करत आहेत. पोलीसांनी या प्रकरणात आतापर्यंत सहाजणांना अटक केली आहे. महिला एचआर फरार आहे.
वैवाहिक आयुष्याबद्दल घाणेरडी टिप्पणी
आठ महिला कर्मचाऱ्यांनी दाखल केलेल्या तक्रारींची चौकशी करण्यासाठी पोलिसांनी विशेष तपास पथक SIT ची स्थापना केली आहे. कंपनीतले सिनियर सहकारी मानसिक त्रास देऊन लैंगिक छळ करतात अशी त्यांनी तक्रार केली होती. कंपनीतलं एचआर डिपार्टमेन्ट त्या तक्रारींकडे दुर्लक्ष करत असं त्यांचं म्हणणं होतं. फेब्रुवारी 2022 ते मार्च 2026 दरम्यान हा सर्व प्रकार घडला. एका आरोपीने महिला कर्मचाऱ्याला लग्नाचं खोटं आश्वासन देऊन तिच्याशी शरीरसंबंध ठेवले असं पोलिसांनी सांगितलं. आरोपीने एका महिला कर्मचाऱ्याला अयोग्य पद्धतीने स्पर्श केला. तिच्या व्यक्तिगत आणि वैवाहिक आयुष्याबद्दल घाणेरडी टिप्पणी केली.
