गेल्या काही काळापासून जागतिक पातळीवर तणावाचे वातावरण आहे, अमेरिका आणि इराण यांच्यातील युद्धामुळे व्यापारावर मोठा परिणाम झाला आहे. अशातच आता भारतातील मद्यप्रेमींची आणि कोल्ड्रिंक्स प्रेमींची चिंता वाढवणारी बातमी समोर आली आहे. कारण आगामी काळात या ड्रिंक्सची कमतरता जाणवू शकते, तसेच बीअरच्या किमतीतही वाढ होण्याची शक्यता आहे. त्यामुळे मद्यप्रेमींना आर्थिक फटका बसण्याची शक्यता आहे. ड्रिंक्सच्या किमती का वाढू शकतात याबाबत सविस्तर माहिती जाणून घेऊयात.
नेमकं कारण काय?
अमेरिका-इराण संघर्षामुळे भारतातील ॲल्युमिनियम सप्लाय चेन प्रभावित झाल्याची माहिती समोर आली आहे. यामुळे भारतात कॅनमधील बीअर आणि डायट कोकच्या तुटवड्याची शक्यता निर्माण झाली आहे. सध्या उन्हाळ्यात कोल्ड ड्रिंक्सची मागणी वाढलेली आहे, त्यातच कॅनमधील ड्रिंक्सची कमतरता निर्माण होत असल्याने अनेकांची चिंता वाढली आहे. मुंबईसह दिल्ली, बेंगळुरू आणि पुणे या शहरांमध्ये कॅनमधील ड्रिंक्सची कमतरता जाणवू लागली आहे.
ॲल्युमिनियम कॅनची टंचाई
युद्धामुळे जागतिक स्तरावर ॲल्युमिनियम कॅनच्या उत्पादनावर आणि पुरवठ्यावर परिणाम झाला आहे. कारण कॅन तयार करण्यासाठी लागणारा कच्चा माल वेळेवर उपलब्ध होत नाही. तसेच काही ठिकाणी कॅनच्या किमतीही वाढल्या आहेत, त्यामुळे उत्पादकांना अडचणीचा सामना करावा लागत आहे. याशिवाय, काचेच्या बाटल्या तयार करण्यासाठी वापरल्या जाणाऱ्या LPG च्या कमतरतेमुळे बाटल्यांच्या उत्पादनावरही परिणाम होत आहे. त्यामुळे उत्पादन घटले आहे.
बीअरसह ड्रिंक्सच्या किंमती वाढणार
ॲल्युमिनियम कॅनची कमतरता भरून काढण्यासाठी अनेक कंपन्या आता UAE, श्रीलंका आणि दक्षिण-पूर्व आशियाई देशांमधून ॲल्युमिनियम कॅन आयात करत आहेत. मात्र, हे कॅन आधीच्या तुलनेत 25 ते 30 टक्क्यांनी महाग आहेत. तसेच काचेच्या बाटल्यांच्या किंमतीत सुमारे 20 टक्के वाढ झाली आहे. इतर पॅकेजिंग मटेरियलही 20 ते 25 टक्क्यांनी महागले आहे. त्यामुळे आगामी काळात कॅनमधील बीअर आणि ड्रिंक्ससोबतच बाटलीबंद दारू आणि इतर पेयांच्या किंमतीतही वाढ होण्याची शक्यता आहे. त्यामुळे सर्वसामान्यांच्या खिशावरील ताण वाढण्याची शक्यता आहे.
