शिवसेना ठाकरे गटाचे नेते सचिन अहिर यांनी शिवसेना शिंदे गटाच्या वतीने विधान परिषद उपसभापतीपदासाठी उमेदवारी अर्ज दाखल केल्यानंतर राज्यातील राजकीय घडामोडींना वेग आला आहे. या पार्श्वभूमीवर शिवसेना नेते आणि मंत्री गुलाबराव पाटील यांनी महत्त्वाची प्रतिक्रिया देत ठाकरे गटावर जोरदार टीका केली आहे.
माध्यमांशी संवाद साधताना गुलाबराव पाटील म्हणाले की, “आम्ही जे भाकीत करत होतो, ते आता खरे ठरताना दिसत आहे. फक्त भाषणे देऊन राजकारण होत नाही, तर जनतेपर्यंत रेशन आणि विकासाची कामेही पोहोचवावी लागतात. तळागाळात जाऊन लोकांमध्ये काम केल्याशिवाय जनतेचा विश्वास मिळत नाही.”
यावेळी त्यांनी उद्धव ठाकरे गटावर अप्रत्यक्ष निशाणा साधत, “शिंदे साहेब आणि पंतप्रधान नरेंद्र मोदी यांच्यावर सातत्याने टीका करून काही साध्य होणार नाही. आपल्या वक्तव्यांवर संयम ठेवायला हवा. लोक सर्व पाहत आहेत,” असेही सांगितले.
दरम्यान, सचिन अहिर यांच्या पक्षप्रवेशानंतर आणखी काही आमदार शिंदे गटाच्या संपर्कात असल्याच्या चर्चांबाबत विचारले असता गुलाबराव पाटील यांनी सूचक विधान केले. “काही गोष्टींची गोपनीयता राखावी लागते. मात्र इतके नक्की सांगतो की, तुम्हालाही आश्चर्य वाटेल असे अनेक मोठे चेहरे आमच्या संपर्कात आहेत,” असा दावा त्यांनी केला.
गुलाबराव पाटील यांच्या या वक्तव्यामुळे राज्यातील राजकीय वर्तुळात नव्या चर्चांना उधाण आले असून, आगामी काळात ठाकरे गटाला आणखी धक्के बसणार का, याकडे सर्वांचे लक्ष लागले आहे.
