विधान परिषद निवडणुकीच्या निमित्ताने राज्यात राजकीय घडामोडींना मोठा वेग आला आहे. मागच्या विधान परिषदेच्या निवडणुकीत एकनाथ शिंदे यांनी बच्चू कडू यांना आमदारकी देऊन बदल्यात त्यांचा पक्षच शिवसेनेत विलिन करून घेतला होता. त्याचाच कित्ता आता या विधान परिषदेच्या निवडणुकीत होण्याची शक्यता वर्तवली जात आहे. हितेंद्र ठाकूर यांच्या बहुजन विकास आघाडीला शिंदे गटाकडून विधान परिषद दिली जाणार आहे. त्याबदल्यात बहुजन विकास आघाडीचं विलिनीकरण करण्याचं ठरलं असल्याची जोरदार चर्चा आहे. हितेंद्र ठाकूर यांना जेव्हा विलिनीकरणाबाबतचा प्रश्न विचारला तेव्हा त्यांनी थेट नकार दिला नाही. त्यामुळे बहुजन विकास आघाडीचं शिवसेनेत विलिनीकरण होणार असल्याच्या चर्चांना अधिकच बळ मिळालं आहे.
विधान परिषद निवडणुकीच्या पार्श्वभूमीवर हितेंद्र ठाकूर यांच्याशी मीडियाने संवाद सााधला. यावेळी त्यांना पक्ष विलिनीकरणावर विचारण्यात आलं. त्यावर त्यांनी थेट भाष्य केलं नाही. विलिनीकरण होणार नाही, असं ठामपणे सांगितलं नाही. घोडा मैदान समोर आहे. आमची चर्चा सुरू आहे. मी आमदार होणार नाही. कोणताही बाप मुलाच्या पाठिशी उभा राहतो. निवडणुकीत पुढे काय होतंय ते पाहुया, अशी सूचक प्रतिक्रिया हितेंद्र ठाकूर यांनी दिली. याचाच अर्थ बविआचं शिवसेनेत विलिनीकरण होणार असल्याचे स्पष्ट संकेत मिळत आहेत.
एकनाथ शिंदेंना भेटणार
या सर्व घडामोडींच्या पार्श्वभूमीवर हितेंद्र ठाकूर हे आज उपमुख्यमंत्री आणि शिवसेनेचे सर्वेसर्वा एकनाथ शिंदे यांची भेट घेण्याची शक्यता आहे. या भेटीत काय निर्णय होतो? की ही भेट थेट पक्षप्रवेशाची असणार आहे? याकडे संपूर्ण राज्याचे लक्ष लागले आहे. आज संध्याकाळपर्यंत या सर्व बाबतचं चित्र स्पष्ट होणार असल्याचंही सांगितलं जात आहे.
आम्ही निर्णायक…
माझ्यासोबत केवळ बविआची मते नाहीत. तर राष्ट्रवादी काँग्रेस आणि कम्युनिस्ट पक्षाचीही मते आहेत. आम्ही निर्णायक ठरणार आहोत, असंही हितेंद्र ठाकूर यांनी म्हटलं आहे. हितेंद्र ठाकूर यांनी विलिनीकरणाचा मुद्दा नाकारला नाही आणि शिंदे यांच्याशी चर्चाही सुरू असल्याचं म्हटलंय. तसेच बाप म्हणून मुलाच्या मागे उभं राहणार असल्याची प्रतिक्रिया दिली. याचा अर्थ हितेंद्र ठाकूर मुलासाठी विधान परिषद घेणार असल्याचं सांगितलं जात आहे. हितेंद्र ठाकूर आता फक्त विधान परिषद घेऊन पक्ष विलिन करणार की मंत्रीपदाचीही मागणी करणार? याकडे संपूर्ण राज्याचं लक्ष लागलं आहे.
