मिडल इस्टमध्ये सुरु असलेल्या युद्धाचा परिणाम भारतासारख्या अनेक देशांवर होताना दिसत आहे. अमेरिका आणि इस्त्रायलने इराणविरोधात सुरु केलेले युद्ध आता भीषण झाले आहे. या युद्धाचा परिणाम सोने आणि चांदीच्या दरावार होताना दिसतो.
गेल्या काही दिवसांपासून सतत आकाशाला स्पर्श करणारे सोन्याचे भाव चांगलेच घसरले आहेत. आजा सोन्याचा भाव पाहून सर्वसामान्यांना आनंद होणार आहे. तसेच त्यांना जर सोने खरेदी करण्याचा विचार असेल तर ते करु शकतात.
जळगावच्या सराफ बाजारात एकाच दिवसात सोन्याच्या दरात जवळपास 7 हजार 500 रुपयांची ऐतिहासिक घसरण झाली आहे. तर चांदीच्या दरात तब्बल 20 हजारांची घसरण झाली आहे.
आज 10 ग्रॅम सोन्याचे दर जीएसटीसह 1 लाख 40 हजार 595 रुपयांवर पोहोचले आहेत. तर चांदीचे दर 2 लाख 16 हजार 300 रुपयांवर आले आहेत. जळगावच्या सराफ बाजारात मार्च महिन्यातील अवघ्या 23 दिवसात सोन्या आणि चांदीच्या दरात आतापर्यंतची विक्रमी घसरण झाल्याचे पाहायला मिळत आहे.
सोन्याच्या दरात गेल्या 23 दिवसांत 34 हजार रूपयांची मोठी घसरण झाली आहे. तर चांदीच्या दरात तब्बल 85 हजार रुपयांची घसरण झाली आहे. सोन्या चांदीच्या दरात गेल्या 40 वर्षाच्या इतिहासात एवढ्या कमी कालावधीत एवढी मोठी घसरण होण्याची पहिलीच वेळ असल्याची सराफ व्यवसायिकांनी माहिती दिली आहे.
सोन्या-चांदीच्या दरात झालेल्या घसरणीचा सराफ व्यवसायिक यांच्यावर देखील मोठा परिणाम झाला असून त्यांना मोठा तोटा सहन करावा लागत आहे. ग्राहकांना दिलासा मिळाला असला तरी गुंतवणूकदारांची मात्र चिंता वाढलेली आहे.
(टीप- वरच्या लेखात दिलेली माहिती ही प्राथमिक स्वरुपाची आहे. या लेखाच्या माध्यमातून गुंतवणूक करण्याचा सल्ला दिलेला नाही. कुठेही प्रत्यक्ष वा अप्रत्यक्ष गुंतवणूक करायची असेल किंवा कोणताही आर्थिक निर्णय घ्यायचा असेल तर त्या-त्या क्षेत्रातील तज्ज्ञांचा सल्ला जरूर घ्या)
