मराठी मालिका, चित्रपट, नाटकं, जाहिराती यांमध्ये अभिनेत्री गिरीजा ओक गोडबोले जेवढी लीलया वावरते, हिंदीतही तिचा वावर तेवढा सहज, सोपा आणि सुखद असतो. ओटीटीवरंचही तिचं काम लोकांना बरंच आवडलं असून काही महिन्यांपूर्वी एका मुलाखतीतील तिच्या अपीअरन्सनंतर गिरीजा डायरेक्ट ‘नॅशनल क्रश’ बनली, रातोरात प्रसिद्ध झाली. सोशल मीडियावर सर्वत्र तिचे निळ्या साडीतले फोटो, तिचे व्हिडीओ व्हायरल झाले. प्रसिद्धीच्या लाटेचा हाँ अनुभव गिरीजासाठी अतिशय वेगळा पण सुखावणार होता. मात्र त्यात ती वाहूनन जाता पाय जमिनीवर ठामपणे रोवून उभी राहिली. अशा या गुणी अभिनेत्रीने अभिनय क्षेत्रात पाऊल ठेवण्यापूर्वी काय घडलं, तिच्या वडिलांनी, प्रसिद्ध अभिनेते, डॉ. गिरीश ओक यांनी तिला काय सल्ला दिला ते सांगितलं. नुकत्याच एका कार्यक्रमात सहभागी झालेली गिरीजा ओक खुलेपणाने बोलली.
अपघाताने या क्षेत्रात आले आणि..
मी या क्षेत्रात आले, जाहिरातीत काम करू लागले ते अगदी अपघाताने झालं. मी, माझ्या आईसोबत एका नव्या जाहीरात प्रोडक्शनच्या ओपनिंगसाठी गेलो होतो. ती कंपनी ज्यांची होती, ते माझ्या आईच्या ओळखीचे होते. मी आईसोबत तिथे गेले असताना, एका कास्टिंग डिरेक्टरने मला पाहिलं आणि तुमची मुलगी एका जाहिरातीसाठी ऑडिशन देईल का ? असं माझ्या आईला विचारलं. होकार मिळाल्यावर तिथेच माझी स्क्रीनटेस्ट घेतली आणि मी त्या जाहिरातीसाठी सिलेक्टे झाले. अगदी अपघाताने आणि अशी सहज मी या क्षेत्रात आले. मग एकातून दुसरी, असं करत वेगवेगळ्या, बऱ्याच जाहिराती मला मिळाल्या, अशी आठवण गिरीजा ओक हिने एनडीटीव्ही मराठीच्या मंच महाराष्ट्राच्या रणरागिणींचा गौरव या कार्यक्रमात सांगितली.
बाबांनी दिला महत्वाचा सल्ला
खरं सांगायचं तर माझे वडील, गिरीश ओक यांना या जाहिरातीबद्दल काहीच माहीत नव्हतं. नंतर माझ्या आईने त्यांना याबद्दल सांगितलं. पुढे मला एका मराठी चित्रपटासाठी , ऑडीशनबद्दल विचारणा करण्यासाठी एक फोन आला. माझी ऑडिशन वगैरे झाली आणि मी सिलेक्ट झाले. चित्रपटाचं शूटिंग सुरू होणार होतं, त्याच्या आदल्या दिवशी माझ्या बाबांनी मला समोर बसवलं आणि ते मला म्हणाले, ‘ जर तुला काही पटलं नाही किंवा आवडलं नाही, तर शांत राहू नको, ठामपणे नकार द्यायला, नाही म्हणायला शीक’ असा सल्ला त्यांनी मला दिला.
पुढे ते म्हणाले, ” हे वय असं आहे की या वयात सगळंच भारावून टाकणारं असतं. आपल्या आसपास जी लोकं असतात ती वयाने, अनुभवाने मोठी असतात, त्यामुळे (आपल्याकडून) पटकन होकार दिला जातो. मात्र नंतर आपल्याला कळतं की (एखादी गोष्ट) आपल्याला हे करायला आवजत नाहीये, म्हणूनच नाही म्हणायला शीक. कोणाचंही मन दुखवू नको पण ठामपणे नकार देता आला पाहिजे ” असा मोलाचा सल्ला वडिलांनी दिल्याचं गिरीजाने या कार्यक्रमात नमूद केलं.
