धुळे जिल्ह्यातील शिरपूर तालुक्यात आज भीषण अपघाताची घटना घडली आहे. अनेर नदीवरील पुलावरून एक भरधाव ट्रक थेट नदीत कोसळल्याने परिसरात एकच खळबळ उडाली. प्राथमिक माहितीनुसार, ट्रक चालकाचं वाहनावरील नियंत्रण सुटल्यामुळे हा अपघात घडल्याचं सांगितलं जात आहे.
मिळालेल्या माहितीनुसार, भरधाव वेगात असलेला ट्रक पुलावरील कठडे तोडत थेट अनेर नदीत जाऊन पडला. अपघातानंतर परिसरातील नागरिकांनी घटनास्थळी धाव घेत मदतकार्य सुरू केलं. घटनेची माहिती मिळताच पोलीस आणि प्रशासनाचे अधिकारीही तातडीने घटनास्थळी दाखल झाले.
दरम्यान, या अपघातात चालक जखमी झाला असल्याची प्राथमिक माहिती समोर येत असून बचावकार्य सुरू आहे. ट्रक नदीत कोसळल्याने काही काळ परिसरात तणावाचं वातावरण निर्माण झालं होतं. पोलिसांकडून अपघाताच्या नेमक्या कारणाचा तपास सुरू करण्यात आला आहे.
