पुणे जिल्ह्यातील राजगड परिसरात काही अज्ञात व्यक्तींनी तलवारीचा धाक दाखवत दहशत निर्माण करण्याचा प्रयत्न केल्याची धक्कादायक घटना समोर आली आहे. या घटनेमुळे गावात भीतीचे वातावरण निर्माण झाले असून नागरिकांमध्ये चिंतेचे वातावरण पसरले आहे. मिळालेल्या माहितीनुसार, अज्ञात व्यक्तींनी गावात येऊन तलवारीचा धाक दाखवत परिसरात दहशत माजवण्याचा प्रयत्न केला. यावेळी माजी सरपंचांच्या घरासमोर उभी असलेल्या कारचीही तोडफोड करण्यात आली. कारच्या काचा फोडून नुकसान करण्यात आल्याचे समोर आले आहे.
या प्रकारामुळे स्थानिक नागरिकांमध्ये घबराट पसरली असून कायदा व सुव्यवस्थेचा प्रश्न ऐरणीवर आला आहे. घटनेची माहिती मिळताच पोलिसांनी घटनास्थळी धाव घेत पंचनामा केला. तसेच या प्रकरणाचा तपास सुरू करण्यात आला आहे. दहशत निर्माण करणाऱ्या अज्ञात व्यक्तींचा शोध घेण्यासाठी पोलिसांकडून परिसरातील सीसीटीव्ही फुटेज आणि इतर तांत्रिक पुराव्यांची तपासणी केली जात आहे. या घटनेमागील नेमकं कारण अद्याप स्पष्ट झालेलं नसून, पोलिसांकडून सर्व बाजूंनी तपास सुरू आहे.
दरम्यान, या घटनेमुळे राजगड परिसरातील नागरिकांनी सुरक्षा वाढवण्याची मागणी केली असून, दोषींवर कठोर कारवाई करण्याची मागणीही करण्यात येत आहे.
