सध्या राज्यात विधान परिषद निवडणुकीची रणधुमाळी सुरु असतानाच एक मोठी खळबळजनक बातमी समोर आली आहे. अहिल्यानगरमधील श्रीरामपुरमध्ये उपमुख्यमंत्री एकनाथ शिंदे यांच्या शिवसेनेच्या नेत्यावर जीवघेणा हल्ला झाला आहे. अज्ञात हल्लेखोर हे दुचाकीवर बसून आले आणि त्यांनी शिवसेनेचे नेते प्रशांत कहाणे यांच्यावर गोळीबार केल्याची प्राथमिक माहिती समोर आली आहे. या घटनेमुळे राज्यात खळबळ माजली आहे.
नेमकं काय घडलं?
मिळालेल्या माहितीनुसार, सोमवारी रात्री पावणेदहाच्या सुमारास श्रीरामपूरातील गोंधवणी रोड परिसरात ही घटना घडली. शिंदे गटाचे युवा विधानसभा संघटक प्रशांत कहाणे आपल्या कार मधून जात होते. तेवढ्यात अचानक दुचाकीवरुन आलेल्या अज्ञातांनी थेट त्यांच्या गाडीवर गोळीबार केला. सुदैवाने हल्लेखोरांचा नेम चुकल्यामुळे कहाणे यांचा जीव वाचला. पण त्यांच्यावर हल्ला कोणी केला? का केला? याचा तपास पोलीस करत आहेत. मात्र, या घटनेमुळे अहिल्यानगरमध्ये मोठी खळबळ माजली आहे.
पोलीस घटनास्थळी दाखल
घटनेची माहिती मिळताच वरिष्ठ पोलीस अधिकारी घटनास्थळी पोहोचले आहेत. त्यांनी तातडीने अजूबाजूच्या परिसराची पाहणी केली आणि हल्लेखोरांचा शोध घेण्यास सुरुवात केली आहे. त्यांनी परिसरातील सर्व सीसीटीव्ही फुजेट तपासून पाहिले आहेत. वाळू व्यवसायातील टोळी युद्धातून गोळीबार झाल्याचा संशय व्यक्त केला जात आहे. गोळीबाराच्या घटनेसंदर्भात श्रीरामपूर शहर पोलिस ठाण्यात गुन्हा दाखल करण्यात आला आहे.
