सर्व काही उद्ध्वस्त करून टाकेन..! केकेआर संघात काय घडतंय? वीरेंद्र सेहवागच्या विधानाने रंगली चर्चाImage Credit source: PTI
Virender Sehwag on Kolkata Knight Riders: आयपीएल स्पर्धेत कोलकाता नाईट रायडर्सची पराभवाची मालिका सुरूच आहे. एका पाठोपाठ एक पराभवाचे धक्के बसत आहेत. काही सामने तर हातातून घालवले आहेत. चेन्नई सुपर किंग्सविरुद्धच्या सामन्यात तर सोपं लक्ष्य होतं. पण या सामन्यातही 32 धावांनी पराभव झाला. त्यामुळे केकेआर संघावर टीकेची झोड उठली आहे. केकेआरच्या सुमार कामगिरीवर आता माजी क्रिकेटपटू वीरेंद्र सेहवागने देखील टीका केली आहे. सेहवागने या पराभवाचं विश्लेषण करताना स्पष्ट केलं की, त्यांची रणनिती आणि फलंदाजीची पद्धत समजण्यापलीकडे आहे. वीरेंद्र सेहवागने क्रिकबझशी बोलताना केकेआरच्या रणनितीवर प्रश्नचिन्ह उपस्थित केलं. वीरेंद्र सेहवागच्या मते, संघाची स्थिती अशीच राहिली तर संघात येत्या काही दिवसात मोठे बदल होऊ शकतात.
वीरेंद्र सेहवाग केकेआरबाबत म्हणाला की, ‘कोचिंग स्टाफ काय करत आहे, ते काय विश्लेषण करत आहेत, हे मला समजत नाही. जर तुम्हाला माहित आहे की तुम्ही चुका करत आहात, तर तुम्ही त्या का सुधारत नाही? तुम्ही त्याच चुका पुन्हा पुन्हा का करत आहात? अशा परिस्थितीत, मला वाटते की एक वेळ अशी येईल जेव्हा घरातील सर्व बल्ब बदलावे लागतील. याचा अर्थ असा की, सगळं काही उद्ध्वस्त करावं लागेल.’
वीरेंद्र सेहवाने पुढे विश्लेषण करताना सांगितलं की, ‘जर एक किंवा दोन सामन्यात पराभव होईल. तेव्हा तुम्ही पाहाल की न्यूझीलंडच्या दोन ओपनरसह खेळताना दिसतील. कॅमरून ग्रीन बेंचवर बसलेला असेल. कदाचित अजिंक्य रहाणेला खेळणार नाही. त्याच्या कोमी दुसरा येईल आणि कर्णधार होईल. रिंकुला बाहेर बसवलं जाईल. हे सर्व होऊ शकतं. कारण तसं पण पराभूत होत आहोत. तर त्यात बदल करण्याचा प्रयत्न असेल.’
कोलकात्याची प्लेऑफमध्ये स्थान मिळवण्याची संधी आता लांबत चालली आहे. सध्या 1 गुणासह गुणतालिकेत तळाशी आहे. त्यामुळे आता उर्वरित 9 पैकी 7 सामने जिंकणं भाग आहे. सध्याची संघाची स्थिती पाहता ते शक्य वाटत नाही. केकेआरचा पुढचा सामना 17 एप्रिलला गुजरात टायटन्सशी होणार आहे. या सामन्यासाठी संघात नक्कीच बदल असतील.
